Hálvthundrað feløg send Skiftirættinum at strika

Skráseting Føroya hevur sent Skiftirættinum hálvthundrað partafeløg, smápartafeløg og iverksetarafeløg og biðið um, at tey verða strikað.

Hetta er á leið tað sama sum í fjør, tá feløgini vóru 53 í tali.

Orsøkin er, at feløgini hava ikki latið Skrásetingini roknskapin fyri 2018.

Freistin var 1.juli.

Feløgini kunnu tó sleppa undan tvingsilsavtøku í Skiftirættinum við at lata roknskapin inn innan ávísa freist.

Tað gjørdu 10 feløg í fjør.

Av teimum hálvthundrað feløgunum, sum eru send Skiftirættinum, eru 13 iverksetarafeløg.

Tey flestu av hinum 37 feløgunum eru smápartafeløg.

Byrja við einari krónu

Tað ber til at stovna íverksetarafelag við einari krónu í kapitali.

Men hetta ger tó ikki, at hugurin at stovna hesi feløg er størri enn hugurin at stovna smápartafelag, har sum minsti kravdi kapitalurin er 50.000 kr.

Helst tí, at krøvini eru á leið tey somu fyri íverksetarafeløg sum fyri smápartafeløg, tá kapitalurin er undantikin.

Í fjør vórðu stovnað 154 smápartafeløg í Føroyum og 111 iverksetarafeløg, upplýsir Skráseting Føroya.

Higartil í ár eru stovnað 117 smápartafeløg og 66 íverksetarafeløg.