Stjórin ikki settur enn

Í morgin eru tríggjar vikur síðani freistin, at søkja stjórastarvið, fór, men enn er nakað eftir á mál, sigur Regin Hammer, nevndarformaður í Vága floghavn, við útvarpið.

– Vit arbeiða enn við setanini, og tað verður helst seinni í hesum mánaðinum, at nýggi stjórin verður settur, sigur Regin Hammer, við útvarpið.

Setanarbólkurin er mannaður við fólkum úr nevndini í Vága floghavn og fólki uttanhýsis, men hvørji tey eru, vil nevndarformaðurin ikki siga, tí tað "kann órógva setanina", sum hann málber seg.

Lønin ein samráðingarspurningur

Tá Gudny Langgaard tók við sum stjóri í Vága floghavn í fjør eftir Jákup Sverra Kass, lækkaði lønin 30.000 krónur, niður í 60.000 krónur. Óvist er, hvørja løn nýggi stjórin fær.

– Lønin er ein samráðingarspurningur, og nýggi stjórin verður løntur eftir førleikunum, sigur Regin Hammer, nevndarformaður, við útvarpið.

Umleið 60 fólk høvdu søkt starvið, sum stjóri í Vága floghavn, tá umsóknarfreistin var úti. Umsóknirnar vóru bæði frá føroyingum og útlendingum.