- Tíðindi, mentan og ítróttur
Sleppa undan eftirlønargjaldi í Føroyum
Tey, sum sigla úti, sleppa nú undan at rinda eftirlønargjald í Føroyum.
Tað upplýsir Jørgen Niclasen, landsstýrismaður í fíggjarmálum, í svari til Johan Dahl, løgtingsmann.
Johan Dahl spurdi, hvussu langt arbeiðið at broyta eftirlønarlógina er komið, so føroyskir útisiglarar sleppa undan at gjalda eftirløn til tvær eftirlønarskipanir.
Støðan í løtuni er tann, at føroyskir útisiglarar í Noregi gjalda eftirløn til tvær eftirlønarskipanir, eina í Føroyum og eina í Noregi, sigur Johan Dahl.
Uppskot til hoyringar
Jørgen Niclasen sigur, at uppskot um lógarbroyting er sent til hoyringar, har mælt verður til, at inntøka, sum er forvunnin uttanlands fyri útlendskan arbeiðsgevara, sleppur undan at rinda eftirlønargjald.
Verður uppskotið samtykt í vár, fær broytingin virknað frá inntøkuárinum 2019.
Sostatt sleppa tey, sum hava inntøku, sum er forvunnin uttanlands, undan kravinum at rinda eftirlønargjald í heyst, sigur Jørgen Niclasen í svarinum til Johan Dahl.
