Bloomberg ætlar at selja fyritøkuna

Ríkmaðurin, Michael Bloomberg, fer at selja kunningarfyritøkuna, Bloomberg, um hann verður valdur til forseta í USA. Tað skriva fleiri amerikanskir miðlar.

Bloomberg, sum hevur verið borgarstjóri í New York, fer nú upp í kappingina um at gerast forsetavalevni hjá demokratunum, og hann ætlar at bjóða Donald Trump, forseta, av á valinum í november.

Hann stillaði ikki upp í Iowa og heldur ikki í New Hampshire, men hann hevur longu brúkt næstan 300 milliónir dollarar til lýsingar, og hann ætlar at brúka tilsamans 500 milliónir dollarar av egnum pengum fyri at vinna á Donald Trump.

Fleiri av hansara egnu eru í øðini, og eitt nú hevur Bernie Sanders sagt, at Bloomberg ætlar at keypa sær forsetaembætið.

Fyritøkan verd meira enn 400 mia. kr.

Michael Bloomberg stovnaði fíggjartænastuna, Bloomberg, í 1981, og hann hevur vunnið stórar upphæddir síðani. Fyritøkan verður mett at verða verd  407 milliardir kr. Sjálvur sigst hann eiga 55,5 milliardir dollarar.

Nú boðar so Michael Bloomberg frá, at hann ikki ætlar ikki bæði at vera forseti og samstundis vera eigari av Bloomberg fyritøkuni.

Meiningakanningar vísa, at Bloomberg liggur væl fyri at gerast forsetavalevni hjá demokratunum, og at 19 prosent av fólkinum vilja hava hann sum forseta.