Vígslugjald fyri útlendingar

Tað fer nú at kosta hjá útlendskum fólkum at verða gift hjá Tórshavnar kommunu. Tað samtykti býráðið í gjárkvøldið. 12 atkvøður vóru fyri, ein var blonk.

Samtyktin er, at Tórshavnar kommuna heitir á Almannnaráðið um at fáa heimild til at taka eitt hóskandi gjald frá útlendskum fólkum, sum søkja um at verða vígd í Tórshavnar kommunu.

Í fjør vóru 60 vígslur hjá Tórshavnar kommunu. Í 23 førum var talan um útlendingar, tað eru fólk, sum ikki búgva her, men bara koma til Føroya fyri at verða vígd.

Í Danmark kostar ein vígsla 1.650 krónur. Tað er ásett í kunngerð. Føroyskar kommunur hava ikki nakra heimild at taka pengar fyri vígslur.