Eisini stórir skaðar í Tórshavnar kommunu

Ódnarveðrið hevur eisini gjørt stóran skaða ymsastaðni í Tórshavnar kommunu.

í Havnini eru nógvir skaða, og stórir skaðar eru um allan Kaldbaksfjørð, serliga á Sundi, í Kaldbak og á landsvegnum millum Kalbaksbotn og Kaldbak. Stórir skaðar eru eisini í Nólsoy.

Annika Olsen, borgarstjóri, og Bogi Jacobsen, tekniskur stjóri hjá Tórshavnar kommunu, eru á rundferð at kanna og skráseta mongu skaðarnar, sum hava verið í kommununi um vikuskiftið.

Borgarstjórin og tekniski stjórin siga, at tað er sera týdningarmikið at skráseta allar skaðar, so ein ætlan um umvælingar verður gjørd beinanvegin.

Í dag verða eisini stig til at rudda upp í fleiri støðum, eitt nú í Kaldbaksbotni, sum flýtur í óruddi frá sandinum og langt fram í dalin.