Illgruni um corona-smittu á ferðamannaskipi

Týska ferðamannaskipið, Aida Aura, sum hevur 1.200 ferðafólk umborð, liggur við bryggju í Haugesund í Noreg.

Illgruni er um, at fólk, sum eru umborð á skipinum, eru smittað við COVID-19 virus. Tað skrivar heimasíðan hjá norska kringvarpinum, NRK.

Tað er reiðaríið sum hevur heitt á norsku myndugleikarnar um at lata skipið liggja, til kanningar eru gjørdar, og úrslitið av kanningunum verður helst greitt seinnapartin.

Úrslitið av kanningum greitt seinnapartin

Illgrunin um, at ferðafólk, ið eru smittað við coronavirus eru umborð, kom í, eftir at tvey fólk á skipinum høvdu hitt eitt fólk, ið seinni vísti seg at vera smittað.

Embætislæknin í Haugeseund, Tveis Quale, sigur, at kanningarnar eru sendar til sjúkrahúsið í Haugesund, og at úrslitið verður greitt seinnapartin. Hann heldur ikki, at tey bæði týsku fólkini eru sjúk.

Umleið 90.000 fólk eru higartil smittað við COVID-19 virusinum, helvtin eru frísk aftur, meðan umleið 3.000 eru deyð, nógv tey flestu í Kina.