USA: Hjálparpakkin endaliga samtyktur

Amerikanska kongressin hevur nú endaliga samtykt og avgreitt korona-hjálparpakkan fyri 2.200 millardir dollarar.

Tað eru umleið 15.000 milliardir krónur í okkara peningi.

Hetta er størsti hjálparpakkin í amerikansku søguni. Hann skal hjálpa bæði fyritøkum og borgarum burtur úr fíggjarligu avleiðingunum av korona-kreppuni.

 Trump skrivað undir

Umboðsmannatingið samtykti lógirnar í gjár, og mikudagin góðkendi hin tingdeildin, senatið, eisini hjálpapakkan, sum Donald Trump, forseti, síðani hevur skrivað undir.

Húski, sum eru rakt av fíggarligum avleiðingum av korona-kreppuni, fáa umleið 20.000 kr. 

Tilsamans eru 290 milliardir dollarar settar av til at hjálpa húskjum.

Meinast raktu fyritøkurnar fáa burtur av tilsamans 500 milliardum dollarum, sum eru settar av. 100 milliardir dollarar eru settar av til sjúkrahúsverkið og heilsuverkið.

3,3 mió. fólk arbeiðsleys

250 milliardir dollarar eru játtaðar í arbeiðsloysisstuðli til teirra, sum eru vorðin arbeiðsleys, ella eru koyrd til hús við ongari løn.

3,3 milliónir amerikanarar aftrat gjørdust arbeiðsleysir í síðstu viku, og tað er tað mesta higartil.