Nú fáa 3.377 fólk lønarískoyti úr ALS

Fólk, sum verða søgd úr starvi nú, kunnu vera í lønarískoytisskipanini hjá ALS í uppsagnartíðini, ella í mesta til 30.juni, tá skipanini eftir galdandi lóg heldur uppat.

Nú eru 3.377 fólk á lønarískoytisskipanini. Tey hava verið stívliga 4000. Men nøkur eru farin aftur til arbeiðis. Og nøkur eru farin í arbeiðsloysisskipanina.

Higartil eru goldnar okkurt um 55 mió. kr. í lønarískoyti. Næsta útgjald verður mikudagin.

Ferðavinnan 800 fólk

Ferðavinnan hevur stívliga 800 fólk í lønarískoytisskipanin. Fleiri eru vorðin arbeiðsleys seinastu vikurnar.

Annars plagdi arbeiðsloysið at minka hesa ársins tíð.

Nú eru 413 arbeiðsleys skrásett hjá Als.