Botnfiskurin er verri nú

Botnfiskur, sum er avreiddur í Føroyum, er verri nú, enn hann hevur verið.

Tað sigur Helgi Abrahamsen, landsstýrismaður, í einum svari til Jóhannis Joensen, løgtingsmann, sum spurdi um rávørugóðsku.

Hann spurdi, hví fiskur, sum verður avreiddur í Føroyum, er verri enn fiskur, sum verður avreiddur í til dømis Íslandi.

Jóhannis Joensen vísir til Dimmalætting 28.februar, har stjórin á Nevinum í Runavík sigur, at í Íslandi hevur fleiri dagar gamal fiskur einki virði.

Skip avreiða ikki botnfisk í Íslandi, sum er eldri enn fimm dagar.

Vánalig hagreiðing

Landsstýrismaðurin svarar millum annað, at Heilsufrøðiliga starvsstova hevur staðfest, at hagreiðingin, og tí eisini rávørugóðskan eru ikki góð í Føroyum, og í summum førum beinleiðis vánalig.  

Trupulleikarnir standast serliga av blóðgingini, aldrinum, hvussu fiskurin er ísaður og skiltur, nøgdini av fiski í hvørjum kassa, innrættingini umborð og handfaringini á landi.

Fiskurin er kroystur, blóð er í vevnaðinum, fiskurin er ikki rætt kruvdur, og ikki allur innvølur er tikin úr fiskinum. 

Góðskan versnað

Kanningar, sum eru gjørdar seinastu árini, vísa, at góðskan á føroyskum ráfiski er versnað, og at til dømis íslendskur saltfiskur er batnaður, stendur í svarinum.  

Vinnan eigur sjálv at ansa eftir, at fiskurin er í lagi.

Helgi Abrahamsen sigur, at sum skilst fær góður fiskur verri enn so altíð betri prís enn vánaligur fiskur.