Læraralønin mótroknað í stjóralønini

Læraralønin verður mótroknað í stjóralønini.

Tað stendur í fráfaringaravtaluni, sum Uttanríkis- og mentamálaráðið og Wilhelm E. Petersen, stjóri í Vinnuháskúlanum, gjørdu fyri einari viku síðani.

Sambært avtaluni fær Wilhelm E. Petersen stjóraløn tað, sum eftir er av hesum árinum.

Men sambært avtaluni skal Wilhelm E. Petersen byrja sum lærari í fullum starvi, tá næsta skúlaár byrjar. Og læraralønin skal so mótroknast í stjóralønini, stendur í fráfaringaravtaluni.

10.000 kr. í advokathjálp

Uttanríkis- og Mentamálaráðið skal, sambært avtaluni, gjalda Wilheim E. Petersen í mesta lagi 10.000 kr.í advokathjálp.

Wilhelm E. Petersen gevst sum skúlastjóri 1.juni, men hann er fríttstillaður frá 18.mai. Wilhelm Petersen bleiv stjóri í Vinnuháskúlanum í desember 2013.

Søkt er eftir nýggjum stjóra. Freistin at søkja stjórastarvið er til 15.juni.

45 starvsfólk eru í Vinnuháskúlanum og har eru millum 250 til 270 næmingar.