Vilja hava frágreiðing um reyðæti

Løgtingið er samt um at biðja um eina frágreiðing um royndirnar eftir reyðæti við Føroyar og, hvussu útlitini eru fyri varandi vinnuligum fiskiskapi eftir reyðæti í føroyskum sjógvi.

Henrik Old eigur uppskotið til samtyktar, og øll Vinnunevndin tekur undir við honum. Fiskimálaráðið hevur givið tilsøgn um fimm royndarloyvi at fiska reyðæti við Føroyar.

Nógvar umsóknir eru komnar um royndarveiðu eftir reyðæti.Fiskimálaráðið sendir tær til ummælis hjá Havstovuni.  

1,5 prosent av nøgdini

Tilmælið er, at kvotan í mesta lagi verður 1,5 prosent av mettu nøgdini av reyðæti.

Henrik Old heldur tað vera løgið, at slík loyvi verða latin,  uttan at løgtingið hevur viðgjørt, um reyðæti skal fiskast yvirhøvur, tí fiskur livir av reyðæti.

Vinnunevndin mælir til, at frágreiðingin um ætlaðu royndirnar at fiska reyðæti verður løgd fram saman við frágreiðingini um fiskivinnuna, sum landsstýrismaðurin sambært lógini um sjófeingi í september á hvørjum ári skal leggja fyri tingið.