Korona: Størsta afturgongdin í 150 ár

Koronafarsóttin er atvoldin til mest umfatandi búskaparligu afturgongdina í 150 ár.

Tað staðfestir Heimsbankin í nýggjari frágreiðing, ið viðger búskaparligu støðuna í heiminum. 

Heimsbankin staðfestir, at hóast fleiri lond hava játtað stórar kreppupakkar og sett í verk stuðulsskipanir, kann væntast, at heimsbúskapurin minkar 5,2 prosent.

Og tá øll lond í heiminum onkursvegna eru rakt av búskaparkreppuni, metir heimsbankin, at talan er um mest umfatandi kreppuna í 150 ár. 

WHO: Støðan er versnað

- Hetta er ikki løtan hjá nøkrum landi at sleppa fótinum av spitaranum.

Tað segði Tedros Adhanom Ghebreyesus, aðalskrivari í WHO, á tíðindafundi í gjár, har hann vísti á, at síðsta samdøgrið eru flestu koronatilburðir skrásettir, síðani smittan fór at ganga.

Tí meðan londini í vestur Evropa og Kina yvirhøvur hava tamarhald á farsóttini, so er støðan verri enn nakrantíð í øðrum pørtum av heiminum. 

Serliga eru tað í eystur Evropa og pørtum av mið Asia, at fleiri nýggir tilburðir eru skrásettir. 

Støðan er eisini álvarsom í Suðuramerika. Aðalskrivarin staðfesti, at einki bendir á, at koronafarsóttin er komin í hæddina enn.