Norðmenn taka ikki ávaringar í álvara

Hetta vikuskiftið var tað fyrsta síðani 12. mars, at fólk aftur í Noregi kundu liva sum vanligt. Og tað gjørdu norðmenn, og serliga í Oslo vóru nógv tiltøk.

Løgreglan upplýsir, at á leiðini við Oslo vóru boð eftir løgregluni 170 ferðir leygarnáttina. Sunnunáttina var heldur friðarligari.

– Koronavirusið gevst ikki at smitta, um tiltøkini verða linkað, og fólk eru ikki betur vard nú, enn tey vóru undan vikuskiftinum. Tí mugu fólk taka ávaringarnar í álvara, sigur Erna Solberg við Dagbladet.

Norski forsætisráðharrin, Erna Solberg, leggur dent á, at um títtleikin av koronu fer at økjast, so verður neyðugt at herða tiltøkini aftur, sigur hon við blaðið.