Kanning: Føroyingar tryggir við kanningar

Føroyingar kenna seg rættiliga tryggar við skipanina við koronukanningum av ferðafólkum, sum koma til landið. Tað vísir ein spurnarkanning, ið spyr.fo hevur gjørt fyri Kringvarpið.

Fólk vórðu spurd "Hvussu tryggan kennir tú teg, nú øll ferðandi verða kannað fyri COVID-19, tá tey koma til landið?" Fólk kundu svara við tølum frá 1-5, har 1 merkti "sera ótryggur" og 5 "sera tryggur".

Triði hvør "miðal tryggur"

14 prosent av teimum spurdu siga seg vera sera trygg við skipanina, sum er sett í verk  fyri at kanna ferðafólk fyri koronu, meðan sjey prosent siga seg var sera ótryggan við skipanina.

Tey allarflestu, ið hava svarað, kenna seg "miðal trygg" ella "yvir miðal trygg" við, at øll ferðandi, sum koma til Føroya, verða kannað fyri COVID-19, sambært spurnarkanningini.

33 prosent hava svarað 3 á einari skipan frá 1 til 5, sum merkir, at tey eru "miðal trygg". 31 prosent hava svarað 4, sum merkir, at tey kenna seg yvir "miðal trygg".