Biðja um pening til kanningar og deild

Fíggjarnevndin hevur fund um fíggjarnevndarskjølini fyrrapartin í morgin. Landsstýrismenninir í fíggjarmálum og heilsumálum hava fingið fundarboð.

Biðið verður um seks milliónir krónur til koronukanningar og góðar 5,3 milliónir krónur til koronudeild á Landssjúkrahúsinum.

Tær seks milliónirnar skulu brúkast til at kanna ferðafólk, sum koma til Føroya eftir 10. juli. Ætlanin var, at fólk skuldu sjálvi gjalda fyri hesar kanningarnar, men landið hevur ikki heimild til at krevja tað.

5,3 milliónir til fyibils koronudeild

Ein meting er, at okkurt um 5.000 fólk koma til Føroya um vikuna. Tað kostar seks milliónir krónur í kanningum í tríggjar vikur.

Higartil eru játtaðar fýra milliónir til tær kanningar, sum hava verið síðani 27. juni. Børn yngri enn 12 ár sleppa undan at lata seg kanna. 

Søkt verður eisini um fimm milliónir og 324.000 krónur til at skipa eina fyribils COVID-19 deild á Landssjúkrahúsinum.

Hóast flestu deildir í Sjúkrahúsverkinum nú í stóran mun eru farnar aftur í vanliga tilbúgvingarstøðu, verður mett at vera neyðugt at hava eina deild tøka til at hýsa møguligum koronusjúklingum, stendur í fíggjarnevndarskjalinum. 

Vanliga virksemið í rættlag aftur

Í fíggjarnevndarskjalinum stendur eisini, at við at fáa eina koronudeild burturav, kemur vanliga virksemið í Landssjúkrahúsinum nærum í rættlag aftur.

Koronusjúklingar eiga at verða avbyrgdir. Hildið verður, at sera sannlíkt er, at koronusmittan kemur aftur í heyst, tá influensan kemur, stendur í fíggjarnevndarskjalinum. 

Skal koronudeildin halda fram næsta ár, kostar hon 900.000 krónur um mánaðin. Koronudeildin skal vera í lonum uttan fyri Landssjúkrahúsið.

Fyribilslonir kunnu setast upp

Sjúkrahúsverkið hevur fingið eitt tilboð frá Landsverki um, at lonir kunnu setast niðan fyri Landssjúkrahúsið fyri 1,7 milliónir krónur. Koronudeildin kann byrja 1. september.

Serfrøðingarnir leggja dent á, at deildin verður so tætt sum møguligt við intensivu deild, so koronusjúklingar sum skjótast kunnu flytast hagar, gerst tað neyðugt.

Í fyrstu atløgu vera fimm sengur í COVID-19 deildini á Landssjúkrahúsinum, men verður brúk fyri tí, kunnu fimm songjarpláss gerast afturat.