Næstan 68.000 smittað eftir einum samdøgri

Síðsta samdøgrið hava næstan 68.000 fólk fungið staðfest COVID-19, og tað er tað mesta nakrantíð, upplýsa heilsumyndugleikarnir í Brasilia.

Tilsamans 2,2 milliónir fólk í Brasilia hava nú fingið koronusmittuna, og stívliga 83.000 fólk eru deyð við koronusmittuni í sær. 

Serfrøðingar óttast, at veruliga talið av smittaðum kann vera nógv størri, tí alt ov fá fólk verða kannað í fólkaríka landinum við 212 milliónum íbúgvum. Næst eftir USA er Brasilia landið við flest koronutilburðum.

Í USA eru nú fleiri enn fýra milliónir fólk staðfest at vera smittað við koronu, og 145.000 fólk eru deyð við smittuni í sær, vísa nýggjastu tølini frá Johns Hopkins University.