Ein smittutilburður aftrat í slovakiska hópinum

Ein smittutilburður aftrat er staðfestur í hópinum hjá slovakiska fótbóltsfelagnum, Slovan Bratislava.

Tilburðurin bleiv staðfestur í gjár, tá ið eitt ferðalag úr Bratislava kom til Føroya, upplýsir Michael Boolsen, formaður í farsóttarnevndini, í tíðindaskrivi.

Fyri at binda um heilan fingur varð koronakanningin gjørd tvær ferðir, og báðar ferðir varð smitta staðfest.

Í sóttarhald

Farsóttarnevndin hevur avgjørt, at alt ferðalagið hjá Slovan Bratislava skal í sóttarhald.

Eftir ætlan skulu KÍ og Slovan Bratislava spæla í Klaksvík í kvøld.

UEFA skal nú taka endaliga støðu til, um dysturin í Champions League-kappingini skal spælast ella ikki, sigur Michael Boolsen.

Meiri verður at frætta í útvarpstíðindunum klokkan 15.