Politistøðin verður ikki liðug fyrr enn í mars

Nýggja politistøðin við Húsagøtu í Havn er nú so nógv seinkað, at politiið fær hana ikki fyrr enn hálvan mars næsta ár.

Politiið skuldi flyta inn tann 1. august í ár. Men tað bleiv av ongum, tí støðin er ikki liðug enn, verri enn so.

Ætlanin var so, at politistøðin skuldi vera klár at flyta inn í tann 1. desember. Men tað verður hon heldur ikki, sigur Michael Boolsen, fúti.

Og nú er greitt, at innflytingin verður 15. mars 2021.

Torført at fáa handverkarar

Orsøkin til seinkingina er, at torført er at fáa handverkarar í hesum koronutíðum. Ein ætlan er gjørd um arbeiðið, sum er eftir at gera. 

Hon er løgd fyri umboð fyri Bygningsstyrelsen, sum er byggiharri, ríkispolitiið og politiið í Føroyum nú í vikuni.

Og úrslitið er, at byggingin verður liðug 15. mars næsta ár.

Politiið leigar frá Bygningsstyrelsen.