Framvegis ógvusligir eldar í USA

Nú eru fleiri enn 30 fólk deyð í eldunum, ið brenna á vestursíðuni í USA.

Harafturat eru tíggjutúsundtals fólk flýdd frá húsi og heimi.

Tað eru í statunum Kalifornia, Oregon og Washington, at eldarnir brenna.

Kalifornia er serliga hart rakt. 28 eldar brenna í statinum og eini 15000 sløkkiliðsfólk eru farin til arbeiðis í eini roynd at basa eldunum.

15 eldar brenna í statinum Washington og 16 í Oregon.

Tað hevur verið nógvur vindur í økinum seinastu dagarnar og tað hevur havt við sær, at eldurin hevur breitt seg skjótt. Veðurforsagnirnar sigur frá minni vindi og kaldari veðri og sløkkiliðsfólk vóna, at tað fer at hjálpa teimum í teirra roynd at sløkkja eldarnar.

Tað hevur leingi verið heitari og turrari í Kalifornia enn vanligt. Tað er ein avleiðing av veðurlagsbroytingum, siga serfrøðingar. 

Tað ger so tað, at eldurin breiðir seg somikið skjótt, at sløkkilið hava torført at fáa tamarhald á støðuni.