Breddin: Kommunuvalið og politikkur í Danmark

Nú verður síðsta hond løgd á at stilla upp til kommunuvalið, sum verður 10. november.

Tað er kortini ymiskt, hvussu stillað verður upp kring landið. Summastaðni er bara ein listi, aðrastaðni verður stillað upp á bygdalistum, og í ávísum kommunum stilla politisku flokkarnir upp.

Men hví er tað, at flokslistar vinna fram summastaðni, og er nøkur felags politisk linja at hóma, har flokkar stilla upp?

Politiskir eygleiðarar viðgera hendan og aðrar spurningar.

Kreppa í Radikala Vinstra

Ein politisk bumba brast í donskum politikki í gjár, tá Morten Østergaard, formaður í Radikala Vinstra, brádliga legði frá sær. 

Orsøkin var, at tað á fundi í tingbólkinum kom undan kavi, at tað var hann, sum fyri 10 árum síðan hevði óhóskandi atburð mótvegis einum floksfelaga.

Í sendingini hyggja vit at, hvørjar avleiðingar tað kann fáa fyri politikk í Danmark.

Breddin í útvarpinum í dag klokkan 17.05.