- Tíðindi, mentan og ítróttur
Meira enn 100.000 staðfest smittað í ein dag
Í gjár var ringasti smittudagur í Hollandi, Fraklandi, Italia, Spania og í øllum heiminum tilsamans.
Spanska stjórnin setti ígjár strong tiltøk í verk í høvuðsstaðarøkinum kring Madrid eftir at talið av smittaðum av álvara er vaksið seinastu tíðina.
Madrid avbyrgdur
Seinastu tvær vikrrnar eru 563 av hvørjum 100.000 fólkum í Madrid smittað, og tað er tvífalt so nógv sum miðaltalið fyri alt Spania.
El Pais skrivar, at 7.000 løgreglufólk eru send út á gøturnar at tryggja lóg og landaskil, og at geva teimum sekt, sum fara útum høvuðsstaðarøkið.
Myndugleikarnir í Madrid hava sagt, at tey vilja ikki hava tilmæli, sum raka rásarúmið hjá fólki, men kortini er kreppustøða lýst og strong tiltøk sett í verk nú.
Herða tiltøkini
Kreppustøða í Spania merkir herda tilbúgving, og at stjórnin kann avmarka rásarúmið hjá fólki, leggja hald á vørur og taka leiðsluna yvir vinnufyritøkum og øðrum virksemi, millum annað privatum sjúkrahúsum.
– Støðan krevur at vit gera nakað og ikki bara standa hendur í hupp, sigur heilsumálaráðharrin, Salvador Illa.
Hann heldur, at tað hevur týdning, at forða smittuni at breiða seg til aðrar partar av landinum. Tí er høvuðsstaðarøkið stongt.
Belgia stongir barrir
Í Brússel í Belgia eru barrir nú stongdar og verða tað í ein mánað, sum ein roynd at steðga smittuni at breiða seg. Belgia hevur leingi staðið ovarlaga á listanum við londum við stórum smittutali.
Nú vóna myndugleikarnir, at hetta tiltakið fer at bøta um støðuna. Men fólk í Brússel eru ørkymlað, tí bara barrir og ikki matstovur eru stongdar. Og fótbóltskappingar verða spældar sum ætlað.
- Hetta er løgið. Í dag kann er fara til 7.000 fótbóltsdystir, men barrirnar eru stongdar, sigur Raphael Raya, borgari í Berlin, við Reuters.
Týskland best tamarhald
Í Týsklandi er talið av smittaðum eisini størri seinastu vikurnar, og myndugleikarnir hava skert upplatingartíðina hjá veitingarstøðum, so at tey hava stongt klokkan 23 til 6 á morgni.
Hetta er galdandi allan oktober. Batnar smittustøðan í Týsklandi ikki innan 10 dagar, verða koronutiltøkini herd, ávarar Angela Merkel, samveldiskanslari.
– Vit fáa at síggja, um vit megna at varðveita tamarhaldið á smittuni í stóru býunum og økjum kring teir, soleiðis sum vit hava gjørt seinastu fýra mánaðirnar, ella um vit missa tamarhaldið, sigur Merkel.
Skeiv gongd í Italia
Týskland hevur higartil verið eitt av londunum í Evropa, sum hevur best tamarhald á koronufarsóttini. Til samanberingar, hevur Bretland fýra ferðir so nógv deyð, meðan Italia hevur tríggjar ferðir so nógv deyð av koronu.
Í Italia veksur talið eisini nú, og seinastu dagarnar eru 5.000 nýggir tilburður staðfestir um dagin, tað mesta síðani 29. mars. Verri er í Russlandi. Har eru triðja dagin á rað meira enn 10.000 nýggir smittutilburðir staðfestir um dagin.
Men ringast stendur til í Bretlandi og Fraklandi, har fyri fyrstu ferð er boðað frá, at 20.000 fólk hava fingið staðfest smittuna í ein dag, vísa tøl frá fronsku myndugleikunum í gjár.