Verkfallið rakar nú eisini B6

Semingsstovnurin hevur havt fund við sjúkrarøktarfrøðingarnar og Lønardeildina í Fíggjarmálaráðnum hvør sær í dag, men grundarlag er ikki fyri at taka samráðingarnar uppaftur, sigur Terje Sigurðsson, semingsmaður.

Hann sigur, at hvørgin parturin hevur flutt seg.

Samstundis boðar sjúkrarøktarfrøðingafelagið frá, at verkfallið verður hert upp aftur meira.

Mánamorgunin klokkan sjey fara sjúkrarøktarfrøðingarnir á B6 á Landssjúkrahúsinum eisini í verkfall. Verkfallið rakar tó ikki leiðsluna á B6 og røkt og viðgerð av palliativum sjúklingum.