Verkfallið rakar nú eisini Suðuroyar sjúkrahús

Suðuroyar sjúkrahús verður nú eisini rakt av verkfallinum hjá sjúkrarøktarfrøðingunum.

Felagið hjá sjúkrarøktarfrøðingunum boðar nú frá, at sjúkrarøktarfrøðingarnir á seingjardeildini á Suðuroyar sjúkrahúsi fara í verkfall hósdagin klokkan 15.

Samstundis verður verkfallið á Landssjúkrahúsinum víðkað.

Seinnapartin hósdagin fara sjúkrarøktarfrøðingarnir á seingjardeildini á A3 og á dagskurði á Landssjúkrahúsinum eisini í verkfall.

Tað stendur framvegis í botni í sáttmálatrætuni millum sjúkrarøktarfrøðingarnar og Lønardeildina, og í gjár søgdu semingsmenninir, at teir gera ikki meira fyribils.