Fleiri dripin og særd eftir yvirgangálop í Wien

Skothendingar vóru á seks ymsum støðum í miðbýnum í Wien. Higartil eru trý fólk deyð av løstunum, umframt gerningsmaðurin, sum løgreglan skeyt.

Yvirgangsmaðurin var ílætin ein bumbuvest, sum løgreglan í Wien seinni segði var ein eftirgjørdur vestur. Minst 15 onnur fólk eru løgd inn á sjúkrahúsið við skotløstum.

Fleiri illa særd

Sambært borgarstjóranum í Wien, Michael Ludwig, er støðan álvarsom hjá sjey teirra. Tað er framvegis ógreitt, um gerningsmaðurin framdi atsóknina einsamallur.

Tær fyrstu fráboðanirnar søgdu, at tað vóru fleiri gerningsmenn. Í nátt søgdu myndugleikarnir, at tey framvegis leitaðu eftir einum øðrum møguligum gerningsmanni.

Eysturríkski kanslarin, Sebastian Kurz, segði, at hetta álopið var uttan iva eitt yvirgangsálop, og álopið var sera professionelt lagt til rættis.

Allir skúlar stongdir

Fyribils hevur løgreglan heitt á fólk um at halda seg burtur frá miðbýnum í Wien, og allir skúlar í Wien eru stongdir í dag.

Løgreglan hevur fingið túsundstals videobrot sendandi frá fólkum, ið sóu hendingarnar í gjárkvøldið, og løgreglan kannar tær upptøkurnar nú.

Løgreglan í Wien sigur í Twitter-boðum í morgun, at motivið fyri álopið í eysturríkska høvuðsstaðnum í gjárkvøldið helst er islamistiskt.

As of 06:30 am, this is what we can confirm towards the assault in Vienna's inner city district: #0211w pic.twitter.com/AIzIovFyKh

— POLIZEI WIEN (@LPDWien) November 3, 2020