John Kerry veðurlagsráðgevi hjá Biden

John Kerry, fyrrverandi uttanríkisráðharri í USA, skal vera serligur veðurlagsráðgevi hjá Joe Biden. John Kerry var amerikanskur uttanríkisráðharri frá 2013 til 2017 í seinnu stjórnini hjá Barack Obama.

Sambært toyminum hjá Joe Biden vísir setanin av John Kerry, at Biden sær veðurlagsbroytingarnar sum eitt sera átrokandi, trygdarpolitiskt mál.

Sambært bretska blaðnum, The Guardian, hevði John Kerry tíðandi leiklut í at gera París-veðurlagssáttmálan. 

Kerry atfinningarsamur móti Trump

John Kerry hevur eisini verið sera atfinningarsamur móti Donald Trump fyri at taka USA úr París-sáttmálanum, sum skal fáa londini at minka um útlátið av vakstrarhúsgassum.

Eygleiðarar siga, at John Kerry ikki er so víðgongdur tá tað kemur til veðurlagslóggávu, og harvið hevur bestan møguleika fyri at finna semjur við republikanararar í senatinum.

Republikanski flokkurin hevur meirilutan í senatinum, og tí verður hetta helst ein av høvuðsuppgávum hansara, skrivar The Guardian.