- Tíðindi, mentan og ítróttur
Ísland: 20 prosent omaná góðgæti
Ein arbeiðsbólkur í heilsumálaráðnum hevur júst handað uppskotum, har m.a. mælt verður til at leggja munandi størri avgjøld á góðgæti, so at tað verður dýrari at keypa, og at prísurin á sodavatni og øðrum søtum drykkjum hækkar við 20 prosentum.
Tað skrivar Morgunblaðið.
Hækka meirvirðisgjaldið
Í uppskotinum frá arbeiðsbólkinum eru eisini uppskot um at seta vørugjøld á sodavatn og orkudrykkir, vatn við sitrónsýru, øll sløg av góðgøti, orku- og proteindrykkir, keks, køkur og annan bakstur.
Skotið verður eisini upp, at hækka meirvirðisgjaldið á "ósunnar vørur - eitt nú leskidrykkir" úr 11 upp í 24 prosent.
Arbeiðsbólkurin sigur í frágreiðingini, at Heimsheilsustovnurin metur, at 20 prosent í avgjaldi á ósunnar vørur kann minka nýtsluna við líka nógvum prosentum.
Ein íslendsk kanning vísur, at sonevnd "prís-toygging" fyri leskidrykkir er eitt prosent, og tað merkir, at fyri hvørt prosent, sum prísurin hækkar, minkar nýtslan av sodavatni eitt prosent, skrivar Morgunblaðið.