Føroyingar í Føroyum kunnu nú fáa CPR-tal

Frá í dag kunnu føroyingar, sum búgva í Føroyum, fáa CPR-tal.

Lógin, sum gevur ríkisumboðnum heimild til at geva donskum ríkisborgarum, sm búgva í Føroyum, CPR-tal, er komin í gildi í dag.

Fólk, sum ætla at klaga um avgerðir, sum eru tiknar sambært lógini, skulu senda klaguna til ríkisumboðið.

Fáa fólk ikki viðhald her, fer klagan til danska Sosial- og Innanríkisráðið.

Samskiftið hjá føroyingum við danskar stovnar og tænastur er sera nógv, og brúk er tí fyri einari smidligari skipan, so føroyingar kunnu fáa CPR-tal at nýta mótvegis almennum og privatum stovnum uttanfyri Føroyar, varð sagt, tá ríkislógartilmælið varð lagt fram.

Ongar ætlanir eru um at brúka CPR-talið í innanhýsis samskifti í Føroyum, varð eisini sagt.