- Tíðindi, mentan og ítróttur
Vinnan vil hava nýtt uppskot um tilbúgving
![](https://kvf.fo/sites/default/files/styles/grein-ovasta-mynd/public/vlcsnap-2019-08-28-11h16m27s700.png?itok=fO12pcBK)
Uppskotið um broytingar í tilbúgvingarlógini er ov ógreitt, tá tað viðger lutin hjá vinnuni í tilbúgvingini.
Tað heldur Føroya arbeiðsgevarafelag.
Felagið vísir á, at landsstýrisfólkið kann áleggja vinnufyritøkum ikki nærri útgreinaðar útreiðslur.
Heimildin er víðfevnd og trupul at leggja upp fyri, sigur Arbeiðsgevarafelagið.
Ikki er greitt, hvat fyri virksemi talan skal vera um, áðrenn ein fyritøka skal hava egintilbúgving.
Oljuvinnan og berghol
Tvey dømi eru nevnd í viðmerkingunum, oljuvinna og berghol, men annars er ásetingin ógvuliga yvirskipað.
Hetta kann gera, at sama slag virksemi verður viðgjørt ymiskt í kommununum, sigur arbeiðsgevarafelagið.
Føroya arbeiðsgevarafelag heldur, at lógaruppskotið eigur at verða broytt og sent aftur til hoyringar, áðrenn tað verður lagt fyri løgtingið.