Føroyskur fiskur lýkur ES-krøv

Fiskur frá smábátum, sum ikki eru løggildir, fer eisini til ES, og ES-myndugleikar hava serligan áhuga fyri eftirlitinum við hesum bátum

Smábátar, sum ikki eru løggildir, fiska 15 prosent av botnfiskinum undir Føroyum. Og júst eftirlitið við smábátum hevur stóran áhuga hjá ES, sigur Heilsufrøðiliga starvsstovan

Johnsigurd Johannesen

29.01.2021 - 15:13

Føroyskur fiskur lýkur ES-krøv.

Tað er niðurstøðan, eftir at ES-eftirlitsmyndugleikar hava kannað Heilsufrøðiligu starvsstovuna síðani 7. januar.

Hetta var fyrsta royndin hjá ES at gera ein slíka skoðan á netinum.

Endamálið var at eftirkanna, um Heilsufrøðiliga starvsstovan lýkur krøvini í veterineravtaluni við ES um fisk og fiskavørur.

Spurdu nógv um smábátar

Nógvir spurningar vóru um skip, og serliga smábátar. Øll ísfiskaskip yvir 20 tons verða løggildað, og regluligt eftirlit er við hesum skipum.

Smábátar undir 20 tons, sum hava fiskiloyvi, verða ikki løggildir, men teir landa eisini til løggildar landingarmiðstøðir. Fiskur frá smábátum, sum ikki eru løggildir, kann fara víðari til ES.

Tí høvdu ES-myndugleikar stóran áhuga fyri, hvussu eftirlitið við smábátum verður skipað. Veiðitølini vísa, at smábátar fiska umleið 15 prosent av øllum botnfiski undir Føroyum.

Skrivlig frágreiðing

Heilusfrøðiliga starvsstovan sigur, at føroyskur fiskur sum heild lýkur ES-krøv. Og um 20 dagar kemur ein skrivlig frágreiðing, har lýst verður, hvørjar tillagingar Heilsufrøðiliga starvsstovan skal gera innanhýsis.