Framskunda fimleikarhøll í Klaksvík

Verkætlanin við fimleikarhøllini í Klaksvík verður framskundað, sigur Karl Johansen, borgarstjóri í Klaksvík. 

Tað merkir, at ætlaða spælilandið fer afturum í raðfestingini. Avtala um hetta er eisini gjørd í sátt og semju við arbeiðstakaran, skrivar Klaksvíkar kommuna.

- Í samgonguni eru vit samd um, at umraðfestingin fer at gagna okkara borgarum, sum heilt vist fáa stóra gleði av eini nútímans fimleikarhøll, sigur Karl Johansen, borgarstjóri.

Semja í samgonguni

Semja er í samgonguni í Klaksvíkar kommunu um, at fleiri pengar skulu setast av til fimleikarhøllina, tí umstøðurnar hjá fimleikafelagnum eru als ikki nøktandi, sigur Karl Johansen.

- Hóast farið er í gongd við at grava út fyri spælilandinum, so er hetta arbeiðið ikki gjørt til fánýtis, tí í fyrstu atløgu verður økið gjørt til parkering, sigur Karl Johansen.

Klaksvíkar kommuna skrivar, at samtykt er at gera uttandura vælveruøkið í svimjihøllini liðugt, samstundis sum rennibreytin verður tikin í brúk í heyst. 

Eisini verður sagt, at saman við menningini av stadionøkinum við Djúpumýru, sum fer at gera tað møguligt at spæla altjóða fótbóltsdystir í Klaksvík, so er alneyðugt, at fleiri parkeringspláss í økinum verða raðfest.