Nú eru vit nærum 53.000 fólk í Føroyum

Fólkatalið veksur støðugt og nærkast 53.000.

Á nýggjárinum var fólkatalið 52.967. Tað vaks 848 fólk í fjør, ella 1,6 prosent, vísa tøl hjá Hagstovuni.

Størsti vøksturin var í høvuðsstaðarkommununi, Runavíkar, Eystur, Nes, Vágs og Tvøroyrar kommunum. Men lutfalsliga stórur vøkstur var í Sandoynni og Suðuroynni.

Hinvegin er fólkavøksturin í Vágum steðgaður.

Hagstovan sigur, at korona tykist ikki at hava ávirkað gongdina í fólkatalinum.

Hóast nettotilflytingin er minkað eitt vet, er burðaravlopið vaksið, og tí er gongdin í fólkatalinum tann sama, sum hon hevur verið seinastu sjey árini.

Meira fæst at vita um fólkatalið her.