153 skrivað undir mótmæli frá festaranum

Nøkur mótmæli eru komin, nú Tórshavnar býráð hevur samtykt at gera serstaka byggisamtykt fyri Fossdalsgjógv við Velbastað.

Býráðið í Havn samtykti 17.desember í fjør uppskot um nýggja serstaka byggisamtykt, tí Gist og Vist ætlar at byggja matstovuna Koks við gjónna.

Freistin at mótmæla var úti í gjár.

153 undirskriftir

Undir tí eina mótmælinum, sum Páll Djóni á Steinum, festari í Fossdali, tók stig til, eru 153 undirskriftir. Páll Djóni á Steinum hevur eisini mótmælt sjálvur.

Eitt mótmæli er frá Kára Thomsen og eitt frá Bóndafelagnum.

Býráðið skal nú viðgera mótmælini. 

Uppskotið um at broyta byggisamtyktina verður síðani saman við mótmælunum sent Býarskipanarnevnd landsins, sum ger tilmæli til landsstýrismannin í kommunumálum, Helga Abrahamsen. Hann tekur síðani avgerðina um byggisamtyktina.