Miðlastuðulin fer nú til verkætlanir

Uppskotið um broytingarnar í lógini um miðlastuðul er komið í Løgtingið. Eftir at uppskotið var til hoyringinar, er gjørd ein broyting.

Ásetingin um, at miðlarnir í minsta lagi skulu hava tvey redaksjonell ársverk, er strikað. Kravið um eina redaksjón við ábyrgdarhavandi redaktøri er nóg mikið fyri at søkja um stuðul.

Higartil hevur leisturin verið tann, at 60 prosent av stuðlinum er latin eftir rakstrarútreiðslunum hjá miðlinum undanfarna ár, og 40 prosent eru javnt býtt millum miðlarnar, sum søkja.

Tíðaravmarkaðar verkætlanir

Nú skal, sambært lógaruppskotinum, søkjast um stuðul til tíðaravmarkaðar verkætlanir, so sum greinarøðir, heimildarsendingar ella poddvarp, sum eru mettar at hava journalistiska dygd og samfelagsligt virði.

Miðlastuðulin er tvær milliónir krónur um árið.

Lógin verður dýrari at umsita enn verandi lóg. Lógaruppskotið kann tí fáa fíggjarligar avleiðingar fyri aðalráðið, sum fíggjar Miðlastuðulsnevndina. 

Møguliga verður talan um samsýning til teirra, sum eru í Miðlastuðulsnevndini. Nú fáa tey fundarpening.