Belarus í staðin fyri Hvítarussland

Danska uttanríkisráðið boðar frá, at Danmark í framtíðini fer at nýta heitið Belarus fyri Hvítarussland. Andstøðan í landinum vil hava tað nevnt Belarus.

- Tíðin er búgvin til, at vit nýta Belarus heldur enn Hvítarussland, tí tað er navnið sum andstøðan og fólkið í landinum ynskir, sigur danski uttanríkisráðharrin, Jeppe Kofod.

Tað er dansk-belariska felagið, Beledania, sum hevur sett fram ynski um, at danir fara at nýta navnið Belarus um Hvítarussland. Frammanundan hevur Svøríki gjørt tað sama.

Noreg broytir ikki

Í Noregi hava Helsingforsnevndin og Kristiligi Fólkaflokkurin heitt á stjórnina um at broyta navnið til Belarus. Ein av grundgevingunum er, at fólk kunnu fáa varhugan av, at Hvítarussland er ein partur av Russlandi.

Norski uttanríkisráðharrin, Ine Eriksen Søreide, segði miðskeiðis í februar, at Noreg fer at halda fram við at nevna landið Hvítarussland, skriva NTB og Ritzau.