SEV kærir vindorkuútboð hjá Umhvørvisstovuni

SEV hevur kært avgerðina hjá Umhvørvisstovuni um at lýsa nýtt vindorkuútboð í Hoyvíkshaganum til Vinnukærunevndina. 

SEV vísir á, at á økinum er ein vindmyllulund frammanundan, og ætlanir eru eisini um eina lund aftrat.

Ein triðja vindmyllulund í sama øki nú, fer at seta el-skipanina undir óneyðuga stórt trýst, sigur SEV.

Einki úrslit

SEV sigur seg hava  gjørt vart við vansarnar hjá Umhørvisstovuni, og hevur eisini biðið um Umhvørvisstovuna um  at taka útboðið aftur, men uttan úrslit.  

Kári Johansen, nevndarformaður í SEV, sigur á heimasíðuni hjá SEV, at SEV hevur ábyrgdina av góðskuni og trygdini í elveitingini til føroyska samfelagið. 

- Umhvørvisstovan hevur við avgerð síni sett trygd og góðsku til viks, hóast tey eiga at vita betur. Tí kenna vit okkum tíverri noydd til at kæra, sigur Kári Johansen.