Vilja hava fleiri kvinnur út í rúmdina

Evropiski rúmdarstovnurin, ESA, søkir í dag eftir fólki at senda út í rúmdina. Talan er um fýra til seks rúmdarfólk 

ESA vil hava fjølbroytni í stovninum, og heitir tí serliga á kvinnur um at søkja. 

ESA hevur í løtuni sjey virkin rúmdarfólk, og av teimum er ein kvinna.

Umframt fýra til seks rúmdarfólk, verður talan eisini um eini 20 eyka rúmdarfólk, sum fáa styttri tíðaravmarkað setanarbræv.

Tey, sum søkja, skulu m.a. lúka strongu krøvini um góða útbúgving, og vera likamliga og sálarliga væl fyri.

Umsøkjarin skal hava í minsta lagi kandidatutbúgving í vísindum, medisini, tøknifrøði, støddfrøði ella teldufrøði, skal duga enskt og vera ríkisborgari í einum av ESA-londunum.

Tilgongdin meira enn eitt ár

Tilgongdin at gerast rúmdarfólk er drúgv og kann, sambært ESA, taka meira enn eitt ár. 

Í oktober 2022 verður væntandi greitt, hvørji nýggju rúmdarfólkini verða.

ESA varð stovnað í 1975, og 22 lond eru limir. Í Norðurlondum eru Danmark, Noreg, Svøríki og Finnland limir í ESA.

Hetta er triðju ferð, at ESA søkir eftir rúmdarfólki.

Evstamark at søkja er 28. mai.