Afturkalling umfatar eisini laks frá Miklagarði

Miklagarður í SMS í Havn boðar frá, at afturkallingin av kaldroyktum laksi, sum Heilsufrøðiliga Starvsstovan sendi út mánadagin 29. mars, nú eisini umfatar laks, sum er merktur frá Miklagarði.

Laksurin hjá Miklagarði er skorin og pakkaður av Sjógæti. Talan er um skivuskornar vørur pakkaðar eftir 1. mars í ár. Orsøkin er, at Listeria monocytogenes er ávíst í nøkrum av vørunum.

Laksurin er seldur í Miklagarði, Bónus og í Mylnunum. Miklagarður skrivar í tíðindaskrivi, at viðskiftafólk kunnu lata vøruna inn aftur til handilin ella burturbeina vøruna.