Gera sendirøð um kongshúsið og Føroyar

Søguliga sambandið millum Føroyar og kongshúsið er útgangsstøðið í eini nýggjari sendirøð, sum Danmarks Radio hevur sett á skránna seinni í hesum mánaðinum.

Høvuðspersónarnir í sendirøðini eru Margretha drotning og Fríðrikur krúnprinsur.

Margretha drotning fer at greiða frá søguliga sambandinum millum kongshúsið og Føroyar, meðan eitt sjónvarpslið hevur fylgt Fríðriki krúnprinsi á ferð í Føroyum. 

Kavar og ruddar plast

Á ferðini fylgir sjónvarpsliðið krúnprinsinum, meðan hann kavar í einum taraskógi, ruddar plast saman við umhvørvisfólki, fær mat til vega við einum Michelin-kokki, tosar við Trónd Patursson um glaslist og er á heimakonsert við Gretu Svabo Bech, skrivar Danmarks Radio.

Fyrsti parturin av sendirøðini, sum hevur fingið heitið Kongehuset på Færøerne, verður sendur 24. mai á DR1 og DR TV.