Hevði ikki loyvi at forða Faroe Agency

Fuglafjarðar kommuna hevði ikki loyvi at forða P/F Faroe Agency at veita loðsflutning í Fuglafjarðar havn. 

Tað er greitt, nú Føroya rættur hevur staðfest eina avgerð hjá Kappingarráðnum um loðsflutning í Fuglafirði.

Byrjaði í 2014

Málið byrjaði í 2014, tá ið Fuglafjarðar kommuna gjørdi av, at bara ein fyritøka kundi veita loðstænastu í Fuglafjarðar havn. 

"Ikki er loyvt einum ella fleiri fyritøkum at misnýta eina ráðandi marknaðarstøðu"

Grein 11 í kappingarlógini

Í 2018 staðfesti Kappingarráðið, at hetta var brot á § 11 í kappingarlógini, tí kommunan hevði forðað P/F Faroe Agency at veita loðsflutning.

§11 í kappingarlógini staðfestir:

- Ikki er loyvt einum ella fleiri fyritøkum at misnýta eina ráðandi marknaðarstøðu.

Kommunan kærdi

Fuglafjarðar kommuna avgjørdi at kæra avgerðina hjá Kappingarráðnum til Vinnukærunevndina, sum 11. januar 2019 staðfesti avgerðina hjá Kappingarráðnum. 

Enn einaferð valdi Fuglafjarðar kommuna at fara víðari við málinum, hesaferð til Føroya rætt, sum so í gjár eisini staðfesti avgerðina hjá Kappingarráðnum í 2018.