Handverkarar og KAF gjørt nýggjan sáttmála

Kommunala Arbeiðsgevarafelagið øðrumegin og Landsfelag Handverkarana og Føroya Handverkarafelag hinumegin hava skrivað undir nýggjan sáttmála. 

Anita Fuglø, samráðingarleiðari fyri Kommunala Arbeiðsgevarafelagið, sigur í stuttari viðmerking, at semjan byggir á somu lønarhækking, sum handverkarar hava gjørt við Fíggjarmálaráðið, men at skeiðið er longt tríggjar mánaðir.

Sáttmálin er galdandi frá 1. oktober í 2020 til 31. desember 2022.

- Tað var stutt millum partarnar, áðrenn vit fóru til samráðingar, og tær hava gingið væl, sigur Anita Fuglø.

Semingsuppskot lagt fram

Terje Sigurðsson, semingsmaður, sigur, at eitt semingsuppskot varð lagt fyri partarnar seinnapartin. Síðani hildu samráðingarnar fram, og tær endaðu við semju.

Sáttmálin verður nú sendur Fíggjarmálaráðnum til góðkenningar. Og áðrenn hann er endaliga góðkendur, hevur KAF ikki fleiri viðmerkingar.

Semingsstovnurin er eisini komin upp í sáttmálatrætuna millum Pedagogfelagið Lønardeildina í Fíggjarmálaráðnum, og í morgin fara semingsmenninir at hitta Pedagogfelagið.