WHO mælir fólki frá at ferðast uttanlands

Heimsheilsustovnurin, WHO, mælir fólki frá at ferðast til útlond, sum støðan við koronusmittuni er. Evropa-stjórin í WHO, Hans Kluge, sigur, at smittustøðan er framvegis álvarslig, og nýggju virusfrábrigdini elva til óvissu.

– Tí heiti eg á øll um at vera varin og hugsa seg um, um tað veruliga er neyðugt at ferðast út í heim,  og heldur avlýsa ferðina heilt, segði Kluge á tíðindafundi í dag.

Sambært Kluge, er indiska virusfrábrigdið staðfest í 26 londum í Evropa. Hann váttar tó, at góðkendu koppingarevnini fyri koronu eisini vinna á nýggju virusfrábrigdunum.