Steingja floghavnir fyri hvítarussiskum flogførum

ES fer at revsa Hvítarussland, eftir at myndugleikarnir tvingaðu eitt ferðafólkaflogfar, sum var á veg úr Grikkalandi til Litava, at lenda í Minsk í Hvítarusslandi.

Tað vóru greiðu boðini frá stjórnarleiðarunum í ES, sum høvdu fund um støðuna í gjárkvøldið.

Hvítarussland revsast búskaparliga

– Vit fordøma tað, sum Hvítarussland hevur gjørt, og fara at revsa landið eftir tí, segði formaðurin í Europaráðnum, Charles Michel.

Avgerð er tikin um at revsa landið búskaparliga, og flogfør hjá hvítarussiskum feløgum fáa ikki loyvi at lenda í nakrari europeiskari floghavn.

Samstundis verður heitt á øll flogfeløg í ES, um ikki at flúgva til Hvítarussland, og heldur ikki í hvítarussiskum loftrúmi. Tað heva fløgfeløg sum SAS, AirBaltic, Lufthansa og KLM, longu tikið avgerð um at steðga við.

ES krevur Pratasevitj leyslatnan

Samstundis krevja tey 27 ES-londini, at myndigleikarnir alt fyri eitt lata andstøðingin, Roman Pratasevitj, og unnustu hansara, Sofija Sapega, leys. Tey vóru við flogfarinum hjá Ryanair, sum varð noytt at lenda í Minsk.

Pratasevitj er eftyirlýstur, tí hann hevur skrivað nógv ímóti Lukasjenko, forseta, sum vann valið í august í fjør, og nú hevur sitið við valdið í 26 ár, í seinasta landinum í Europa, sum verður nevnt einaræði.

Stýrið í Hvítarusslandi tvíheldur um, at talan var um eina bumbuhóttan ímóti flogfarinum, men tað hevur millum annað týski samveldiskanslarin, Angela Merkel, víst aftur. Ógvuslig mótmælir hava verið í Hvítarusslandi síðani valið í august í fjør.