Kina vísir aftur koronu-ástøði

Tað stendur í eini amerikanskari fregnartænastufrágreiðing, sum Wall Street Journal, hevur fingið innlit í. Fólkini vórðu innløgd, langt áðrenn Kina staðfesti, at talan var um eina illa smittandi sjúku, og boðaði Heimsheilsustovninum frá.

Kina hevur ferð eftir ferð víst aftur, at smittan byrjaði á eini kanningarstovu, sum millum annað Donald Trump, forseti, førdi fram, skriva AP og NTB.

Ein talsmaður fyri kinesiska uttanríkisráðið sigur amerikansku frágreiðingina vera burturvið. Higartil hevur farsóttin kravt 3,4 milliónir mannalív, men uttan iva eru nógv fleiri deyð.

Gjørdu kanningar í vár

Serfrøðingar frá Heimsheilsustovninum vóru leingi í Kina í vár. Teirra niðurstøða var, at COVID-19 stavar frá flogmúsum, og hevur síðani flutt seg til fólk um vegis okkurt annað kykt, kanska súgdjór.

Sambært stjóranum í WHO, Tedros Adhanon Ghebreysus, høvdu serfrøðingarnir ilt við at fáa nóg neyvar upplýsingar, meðan tey vóru í Kina.

Umboðini fyri tey 14 londini, sum vóru við, heittu staðiliga á kinesisku myndugleikarnar, um at fáa neyðugar upplýsingar, so greiða kann fáast á, hvaðani koronufarsóttin stavar.