Poul Schlüter deyður

Fyrrverandi danski forsætisráðharrin, Poul Schlüter, er deyður 92 ára gamal.

Hann er tann forsætisráðharrin í Danmark eftir seinna heimsbardaga, sum hevur sitið longst.

Poul Schlüter var forsætisráðharri í 11 ár, í fýra valskeiðum, frá 1982 til 1993, tá stjórnin legði frá sær.

Hann var eisini forsætisráðharri, tá avtala varð gjørd fyri landsstýrið, um at Føroyar kundu yvirtaka ráevnini í føroysku undirgrundini. Tá hevði verið samráðst um undirgrundina í mong ár.

Poul Schlüter og Atli Dam, løgmaður, skrivaðu undir avtaluna í Tinganesi fyri jól í 1992.