Korona: Eingin ferðsla úr Nuuk

Øll loft- og sjóvegis ferðsla úr grønlendska høvuðsstaðnum Nuuk heldur nú uppat.

Tað skrivar grønlendski miðilin Sermitsiaq.

Orsøkin er, at fimm koronasmittutilburðir vórðu staðfestir í Nuuk í gjár, og í dag er ein smittutilburður staðfestur í Ilulissat, upplýstir Henrik L. Hansen, landslækni.

Stúra fyri fleiri tilburðum

Í Nuuk stúra tey fyri fleiri smitttutilburðum, tí tvey av teimum smittaðu hava verið til størri tiltøk um vikuskiftið, bæði kaffimik og í konfirmatiónsveitslu, skrivar Sermitsiaq.

Myndugleikarnir í Grønlandi halda, at tey smittaðu hava verið í sambandi við umleið 200 fólk um vikuskiftið.

Hóast eingin loft- og sjóvegis ferðsla verður úr Nuuk, verða ikki fleiri smittuverjutiltøk sett í verk.

Landslæknin sigur sambært Sermitsiaq, at tey hava góðar møguleikar fyri at avbyrgja hetta smittuútbrotið, tí tey smittaðu eru funnin tíðliga í tilgongdini.

Henrik L. Hansen

Henrik L. Hansen er landslækni í Grønlandi.