Koppseting neyðug fyri at basa Delta-frábrigdinum

Tað hevur alstóran týdning at fáa fólk koppsett fyri koronu sum skjótast.

Tað var niðurstøðan hjá leiðarunum í ES, sum í gjárkvøldið umrøddu støðuna við nógv smittandi Delta-frábrigdinum av koronu.

Týski samveldiskanslarin, Angela Merkel, segði kortini, at tilburðirnir av korona fækkast, so hvørt sum fólk verða koppsett.

- Hóast vit kunnu vóna tað besta, so er koronakreppan langtfrá av, serliga í teimum fátæku londunum er støðan ring. Og bæði í Týsklandi og í Evropa sum heild er støðan ivasom, sigur hon við AP tíðindastovuna.

Evropiska miðstøðin fyri at hava tamarhald á smittuni roknar við, at 90 prosent av øllum fólkum, sum verða smittað og gerast sjúk av koronu í august, verða smittað við Delta-frábrigdið.