Ferðafólkatalið bara ein triðing av metinum

Hóast ferðafólkastreymurin til Føroya er byrjaður aftur, so ferðafólkatalið langt frá 2019 árinum, sum var serliga gott. 

Tað skrivar in.fo. 

Í 2019 ferðaðust 424.281 ferðafólk umvegis flogvøllin, men so kom korona, og ferðafólkastreymurin steðgaði. 

Í fjør ferðaðust úti við 180.000 ferðafólk um flogvøllin.

Gongur rætta vegin

Nýggjastu tølini hjá Vága Floghavn vísa, at juni mánaði í ár var nógv betur enn juni í fjør.

17.906 ferðafólk fóru um flogvøllin í Vágum í juni, og tað vóru 80 prosent fleiri enn juni í 2020.

Fyrra hálvár í 2019 ferðaðust 186.099 fólk um flogvøllin í Vágum. Fyrra hálvár í ár vóru tey 72.350 .

Heldur gongdin í ferðafólkatalinum fram, sum hon hevur gjørt seinastu tíðina, verður 2021 eitt betur ár enn 2020, men tað fer ikki at koma í nánd av 2019.