Nú er Fíggingargrunnurin strikaður

Fíggingargrunnurin frá 1992 er nú strikaður í partafelagsskránni. Hann er ikki til longur.

Grunnurin, sum umsat partapeningin hjá landinum í BankNordik, fór í sjálvbodna likvidatión stutt fyri jól í fjør.

Tann likvidatiónin er nú endað.

Jørgen Niclasen, landsstýrismaður, segði longu í september í fjør, at Fíggingargrunnurin skuldi takast av.

Landið skuldi síðani beinleiðis eiga partabrøvini í BankNordik. Landið eigur ein triðing í BankNordik.

Partabrøvini

Hvat hendir við partabrøvunum - um tey til dømis verða seld, er ikki avgjørt enn. Men tað verður kannað, segði Jørgen Niclasen í september í fjør.

Og tað verður kannað enn, segði Jørgen Niclasen í farna mánað.

Í seinastu nevndini hjá Fíggingargrunninum vóru Katrin Thorsvig Hansen, Arne Poulsen, Atli Suni Leo, Eli Christiansen og Helga á Borg.

Eli Christiansen var formaður.