Nøkur hundrað síl eru eftir í Heygadali

Hóast endaliga freistin at taka av øll tey føroysku ælabogasílini fór fyri meira enn tveimum mánaðum síðani, so hevur Røkt ikki fylgt boðunum frá myndugleikunum enn. 

Felagið hevur nøkur hundrað síl eftir í Heygadali í Vestmanna. Ætlanin er at hava tey har eina tíð aftrat, tí stjórin, Jóhan í Nirðistovu, vónar, at avgerðin hjá politikarunum verður broytt.

>>>DREPA SEINASTU ÆLABOGASÍLINI Í KVØLD, sí innslag her<<<

Hann sigur í stuttari viðmerking, at hann hevur tosað við fleiri politikarar, og hann væntar at fáa svar skjótt, so tað ber til at varðveita føroyska sílið.

Rinda dagbøtur

Men tað er ikki ókeypis hjá Røkt at ganga ímóti boðunum frá myndugleikunum. 

Røkt rindar nevniliga dagbøtur fyri hvønn dag, felagið hevur havt síl, eftir at freistin var farin mánadagin 21. juni.

Røkt vil ikki upplýsa fyri Kringvarpinum, hvussu stórar dagbøturnar eru.